Tuesday, April 8, 2008

بعد الاضراب



أنا فرحان .. بجد مبسوط أوى بسبب اللى حصل يوم الحد..

مبسوط لأن الاضراب مكنش منظم بدرجة كافية .. لأن الامكانيات كانت صفر كبير .. لأن اهدافه مكنتش واضحة أو محدده .. لأن كان فى كالعادة ناس محبطين قاعدين يقولوا ان الاضراب مش هينجح ومفيش فايدة .. وحتى بعض الاضراب تلاقيه شمتان وعايز يثبت بكل الطرق انه فشل( تحس انه شوية وهيطلعلك لسانه) .. وكأنها بلدى لوحدى مش بلده هو كمان.. مش حاسس باللي احنا حاسين بيه . مش حاسس ان الناس جعانه .. الناس تعبانة .. كفاية بقى!

ومع ذلك نجح فى حاجات كتير ..

نجح فى الدعاية .. أنا متأكد ان عدد اللى يعرف ان انهارده فى انتخابات محليات ميساويش %1 من اللى سمعوا عن الاضراب! .. الاضراب نجح لان دى أول مره نشوف الشوارع فاضية كده .. نجح لأن اصحاب الفكره اشخاص مش احزاب ولا حركات يعنى امكانيتهم اضعف .. نجح فى انه ينشر ثقافة الإضراب اللى احنا مش متعودين عليها .. لسة نغمة جديدة بنسمعها وبتعلم اصولها

واحده واحده ..مسمعتش عادل امام بيقول .. هو كل من لعب كوره بقى الخطيب؟

***

تعليق عجبنى على أحد المنتديات

وكانت النكتة السياسية

أن الشعب انقسم قسمين

قسم يعلم ويتضامن

وقسم لا يعلم ويتضامن!!


***
فى رأى انه نجح قبل حتى أن يبدأ ..
يوم السبت اللى فات كنت نازل اجرى مع اصحابى فأخدت تاكسى من بيتنا الى مكان التجمع وكعادتى عند دخولى التاكسى لسه بقول "سلا.." .. لقيت تمثال صغير للعذراء مريم فوق العداد .. فبلعتها ووطيت صوتى لحد أما اتكتمت

بصيت على الراجل .. وكان واضح عليه البساطة الشديدة .. فحبيت أسئله عن رأية .. ودار الحوار كالتالى

أنا : هتشارك فى الاضراب بكره؟
هو: والله (وبدون اى سبب بدأ بالحلفان ) منا نازل بكره ولا انا ولا مراتى ولا عيالى .. قاعدين فى البيت ..
أنا قلت فى بالى مهو مسيحى يعنى كده كده ممكن يكون بياخد الحد أجازه!
هو - قاطعا أفكارى- : أصل أنا يوم الحد بشتغل الصبح وبقعد بالليل مع عيالى .. بكره بقى اخده كله معاهم فى البيت
أنا : أحسن بردو .. بس انت مقتنع بالاضراب؟
هو : اه طبعا
أنا: طب باقى أصحابك و قرايبك؟
هو: اه معظمهم قاعدين بكرة ..
أنا : هما كلهم موظفين؟
هو : أخويا مراته موظفه وهيقعدوا فى البيت مش نازلين ..بس مش عارف بقى هيعملوا ايه بعد الللى قاله وزير التعليم ووزير الداخلية .. تخيل قطعوا ماتش الاسماعيلى و الاتحاد وذاعو حوار معاهم .. وزير الداخلية قالك التهم جاهزه عالاسامى بس-بحسب ما فهم- .. ووزير التعليم قال :"المدرس اللى هيغيب بكره هيتخصمله 10 ايام" .. قام المذيع سأله: "طب اللى عيان أو عنده اى ظرف؟" .. قاله: "يبقى حظه كده" .. افترى عالناس.

انتهى الحوار بوصولى لمكان تجمع اصدقائى .. كنت فى غاية السعادة لما نزلت من التاكسى .. تخيل ان يكون انسان فقير .. ومسيحي .. و امرأه .. ويملك الشجاعه ليقول :"لا" .. وليشارك فى الاضراب!
الأكثر غـُـلبا ً( بضم الغين) و سلبية ًَ و ضعفا ً فى مجتمعنا .. سيشارك فى الاضراب ..

أليس هذا نجاحا ً؟

***
يوم الاضراب

اضطريت يوم الاضراب انى انزل بالليل
.. لبست تى شيرت سوده ونزلت
ركبت التاكسى .. سواق قديم أوى ..أنتظرت قليلا ً .. ثم قررت ان أسأله عن احوال الشغل .. فاذ بى ينظر لى نظرة بؤس - كنت فاكره هيعيط - وقال :" والله معملتش 15 جنية انهارده يا بيه" .. سكت شوية بعدين قلتله :" كل دا عشان الاضراب؟" .. فقالى :"اه" .. فسألته: " وانت ايه رأيك؟" ..

توقعت طبعا انى هسمع وصلة سب ولعن فى اللى عمل الاضراب واللى جاب اللى عمل الاضراب .. الخ ..

قال لى: " يا بيه هوا دا إضراب .. فى إضراب يبقى يوم واحد .. البلد دى عايزه يا ابيض يا اسود .. اضراب يعنى نجيب 5 كيلو طماطم وبـ 8 جنية عيش وورق جرايد .. ونفرش الارض ومنقمش غير لما الحال يتغير .."

قلتله :" بس دى لسة البداية .. واحده واحده"

قاطعنى : " يا بيه .. يا بيه اسمعنى .. البلد دى يا ابيض يا اسود .. محنا كده كده ميتين .. ابويا قاعد فوق بقاله 25 سنة ومش حاسس ومس هيحس"

اخدت شوية وقت على ما فهمت يقصد ايه بـ "أبويا"

وأستمر باقى السكة فى التأكيد على فكرة الابيض والاسود

الراجل دا مكنتش محروق عشان مكسبش غير 15 جنية .. كان محروق عشان كان نفسه الاضراب يولع أكتر

دليل اخر على تحول المصريين من ثقافة الاستسلام للأمر الواقع .. إلى ثقافة لمطالبة بالحقوق .. ثقافة الاضراب


***
قصص اخرى
قصص كثيره على المنتديات عن مصلحة حكومية كان فيها موظفة واحده ..
وعن مدرسة منع فيها تلاميذ فى تانية اعدادى باقى التلاميذ عن الشرا من الكانتين وانه الفصول كانت فاضية..
وقصص اخرى عن مدارس بأكملها اضربت.وان خمس عمال البحيرة اضربوا عن العمل.

وعن مظاهرات فى 9 محافظات ..



- ذهب أحد اصدقائى الى الجامعة لظروف الامتحانات وقالى الجامعة انها كانت بتنش وكان فى كرنفال عاملاه الكشافة .. وغالبا كانوا عاملينه لنفسهم!


***
جامعة القاهره


حلوان

الازهر

***

التناقض الغريب هنا هو ما قام به التلفزيون والصحف القومية قبل الاضراب .. الاهرام مثلا بكل ثقه بدأوا مقالتهم بعنوان " من المؤكد أن شوراع المحروسة لن تكون فارغة غدا ..." .. ونسيوا يكملوا " من سيارات الامن المركزى .. !"

عدد العساكر كان أكبر من عدد الناس .. جتكوا خيبة .. اه يا جبنه!

على رأى واحد أعرفه .. قال

انظروا إلى ذعر الحكومة من هذه التحركات البسيطة
لقد ذعروا عندما قال بعض الناس بخ

فماذا لو قلنا جميعا بصوت واحد عو!!!!!


ماذا لو قلنا عو؟!! .. سؤال يطرح نفسه!

50 عربية امن فى ميدان التحرير!
10 عربيات امن عند سينما روكسى لمجرد انهم قالوا انها نقطة التجمع فى مصر الجديدة!
وطبعا عند الجامعات وميادين البلد كلها! .. شئ غريب وكأن المتظاهرين داخلين حرب!


***
مش عارف أقول ايه على الصورة دى .. بجد مسخره .. ادى عساكر الامن المركزى - واخدلى بالك من الامن -

ياللا امال التهم هتتلقف ازاى


***
المحلـــــــــــة
مكنتش عمرى اتصور ان مصر يحصل فيها كده .. طبعا انا ياما حكولى عن 18 و 19 يناير 77 بس عمرى ما شفت بعيني حاجة كده قد اية الناس فاض بيها .. الناس تعبت .. الناس جعانة .. وفى المقابل الامن المركزى بيرد بالغازات المسيلة للدموع والرصاص المطاطى !
تقرير الجزيرة الانجليزية