Thursday, November 15, 2007

حكاية ربع جنية

راكب الميكروباص ومروح بيتنا ماشيين في امان الله السواق بيلم الاجره

"على جمب ياسطى" صرخ احدهم


وقف السواق .. بص كده مين نازل .. لقي تلاته

ايوه يا بيه الاجره لسه كده


ازاى يا عم محنا دافعينلك

دافعين ازاى .. لسه يا بيه دفعتوا جنيه .. نص جنيه كمان

انا (جوايا) .. معطلنا عشان نص جنيه ماشى خلينى ساكت

واحد من التلاته : نص جنيه .. داحنا اللي لينا ربع

- طبعا هما حسبتهم ربع جنيه ×3 .. اما هوا نص×3

انتوا اجرتكوا نص جنيه النفر يبقي انا ليا نص

طب ايه رأيك بقى مفيش نص جنية وهتجيب الربع

هى عافيه يعني

اه عافيه بقي .. ووريني هتتحرك ازاي( وقف قدام الميكروباص)

قام الراجل دايس بنزين وطالع .. طبعا خبطه

برست ايده ودببب عالازاز بتاع الميكروباص ( قال يعني اتعصب وهيكسر الازاز) .. خلع مساحة

يابن الـ**** انت بتعمل ايه .. انزل (مسكه من هدومه وفتح الباب) .. بقولك انزل ورينى نفسك

قام السواق مادد ايده تحت الكرسى وجاب ماسوره حديد ونزله

ومسكه في بعض

فضلوا يدحرجوا لحد اما طلعوا عالرصيف

استطاع اصدقاء اخينا الزبون انهم يمسكوا الماسوره من السواق قبل مايرتكب جنايه .. وحاولوا يهدوا الموقف شويه

اهدي ياسطى

سيب العصاية .. مش سايبها

هات دي بتاعتى .. لأ دي بتاعتى

احم .. نكمل .. انا طبعا - زيي زي الناس اللى فى الشارع واللى راكبين - عمالين نتفرج ومستمتعين جدا .. ولأنى كنت قاعد جمب السواق .. فالتفاصيل كانت واضحة جدا

اخيرا ظهر الفارس الهمام .. واحد ابن حلال شكلة كده أمين شرطة ولا حاجة - أمين شرطه وابن حلال ازاي؟- المهم يعني .. فاعل خير .. هدى الموقف وخلى السواق يطلع الربع جنيه

خدو الربع جنيه .. وعدو الشارع .. السواق قعد يظبط المساحة اللى اتخلعت دى .. وهما بيعدوا الشارع واحد منهم زعق " ياسطى .. ياسطى"

بص السواق

بردو خدنا الربع جنيه"ز"




Saturday, November 3, 2007

Monday, May 21, 2007

ستالين والحزب الوطني

جوزيف ستالين .. احد ابرز رموز الشيوعيه في العالم .. ولد في عام 1879 ومات عام 1953 .. يقال ان هذا الرجل تسبب في قتل اكثر من 50 مليون انسان اثناء فتره حكمه روسيا.
Josef Stalin 1879- 1953

كانت الانتخابات الداخليه للحزب الشيوعي في روسيا قد بدأت .. وقام اعضاء الحزب بالتصويت وكانت المفاجأه .. لقد حصل ستالين - رئيس الحزب - علي 600 صوت فقط من 1900 صوت .. بينما لم يوافق 1300 عضو علي اعادة انتخابه.

فماذا فعل ستالين ؟؟ .. قام ستالين بالتخلص من الـ1300 عضو الذين لم يصوتوا له .. اعدمهم جميعا ( طبعا انت مبحلق دلوقتي في الشاشه ومش مصدق ) .. واعاد الانتخابات وفاز بالاجماع!


عامة مستغربش اوي .. الحزب الوطني الديموقراطي قرر يعيد التاريخ مره اخري وقام بفصل اتنين من اعضاؤه هم النائب طاهر حزين والنائب محمد حسين بدعوي عدم الالتزام الحزبي.

الاول قدم استجواب ضد وزير النقل بسبب صفقه مع احدي الشركات تم فيها اهدار للمال العام .. ودي حاجه محصلتش من 30 سنه ان نائب في الحزب الوطني يقدم استجواب ضد الحكومه .. طول عمرهم عايشين بمدأ زيتنا في دقيقنا.

طيب اوي وعلانياتك ..!


والثاني وقف في وسط المجلس الموقر وقال " كل حاجة الرئيس.. كل حاجة الرئيس، كفاية بقى.. كفاية بقى، أطلع من هدومي".. وقام قاطع جاكتة البدله!

وانت اطيب من الاولاني ..!!

الظريف بقي ايه .. انهم معرفوش الخبر غير من الجرايد .. الحزب الوطني بيوفر تمن الجواب والطوابع ..

علي فكره الاتنين مكنوش موافقين علي التعديلات الدستوريه .. مش بقولوكوا ناس طيبين اوي ..

ها مين عرف الشبه بين ستالين والحزب الوطني؟؟

Wednesday, May 9, 2007

في الشارع


بقالي شهرين كل يوم وانا رايح الجامعه اشوف البتاعه دي

انا ضد مبدأ الشتيمه طبعا بس الصراحه مقدرتش امنع نفسي من ممارسة هوايتي المفضله

الغريب انهم سايبنها طول الفتره دي كده .. باييننا عندنا حرية تعبير وانا مش واخد بالي

المهم .. بعد مشاورات داخليه يوميه طوووويله مع نفسي
قررت اخيرا واخدت الكاميرا
ونزلت صورتها
طبعا كانت ركبي سايبه وقلبي بيتنفض مقولكمش

كان نفسي اخد صوره جمبها .. بس الشارع كان فاضي مكنش في بني ادم يصورني
الناس خايفه تعدي من جمبها .. قالك بلاش نمشي في الشارع من اساسه لحد اما يشيلوها

انتهيت من التصوير وقررت الرجوع الي المنزل
لفيت
عديت الشارع
ببص ورايا لقيت عربية اتاري جايه
قلت بس .. رحنا في طوكر
اكيد دا كان كمين
وطلعت انا كبش الفدا
اتسمرت في مكاني لحد اما العربيه عدت وربنا ستر
الله يجازيه اللي ربالنا الرعب

Sunday, April 29, 2007

خطايا وزير التعليم


لأني ضحيه من ضحايا هذا الرجل .. للأسف اكن له كره وبغض شديد ليس لشخصه ولكن لما وقع فيه من خطايا لا تغتفر.

مش عارف ابدأ منين الصراحه .. واتكلم عن ايه ولا ايه .. انا فاكر ايام امتحانات تالته ثانوي .. كانت فتره من اسوأ فترات حياتي .. امتحانات في منتهي التخلف والتعقيد.

العربي .. دا مصيبته مصيبه .. نموذج الاجابه غلط .. كل مدرس يصلح علي مزاجه .. وفي طبعا في ناس حقها ضاع لأن في مدرسين ميعرفوش حاجه عن المنهج ( مدرسين اول ثانوي) .. ودول بالسلامه طبعا .. والغريب انهم اكتر من سؤال .. يعني اللي حط النموذج دا كان متوول .. شارب حاجه ..

الانجليزي .. ولأول مره في تاريخك يا مصر نسمع عن حالات انتحار بسبب امتحان .. عمري ما هنسي البنت اللي روحت مكتئبه بعد الامتحان قامت شدالها مبيد حشري وطبعا ملحقوهاش وراحت فيها .. ملعون ابو التعليم يا اخي .. والبيه طالع بعدها في البيت بيتك يقولك دي حاجه تزعل اكيد .. تصدق كنت فاكرها حاجه تفرح .. عملوا ايه اهلها بطلعتك البهيه دي .. خدوا ايه من التعليم غير ضياع بنتهم!

الفزيا .. سابقه من نوعها بردو .. مفيش شكاوي من امتحان الفزيا غريبه .. بس ميقدروش يسكتوا ..
وراها علي طول امتحان الاحصا .. وتتوالي حالات الاغشاء .. انا فاكر بعد الاحصا دا طلعت من اللجنه قعدت في حوش المدرسه القذره اللي كنت بمتحن فيها وجبت ازازة ميه ساقعه ودلقتها علي دماغي .. كنت بحاول افوق نفسي من الصدمه.

وطبعا محدش ينسي امتحان التفاضل وامتحان الميكانيكا .. الصراحه دول انهوا كل امل الطلبه نهايه مأسويه .. بس بردو الوزاره كانت حنينه .. حطط التفاضل تاني امتحان والميكانيكا اخر امتحان .. وماله تنويع بردو!

سابقه اخري تسجل بأسم السيد الوزير وهي الغش الجماعي .. مش عارف اقول ايه بجد .. غش جماعي ؟؟ .. دانا كنت في عرض سؤال في امتحان الميكانيكا يا ولاد الـ***.

انتحار .. اغماء .. وتقطيع ورق .. ايه مش مصدق؟ .. مشرفين اللجان كانوا بيلعبوا بازل .. ورقه من هنا علي ورقه من هنا .. خلينا ننفع الناس .. حاجات جميله!

المهم بعد كل المصايب والمهازل دي .. طلعت النتيجه .. مجاميع رهيبه .. صاروخ الحد الادني للكيات غلي .. قصدي ارتفع زي الاسعار .. بقي يا عيني اللي جايب 96 في علمي علوم ميلحقش حاجه .. يا نهار اسود .. حتي المجاميع غليت .. الله يرحم خال امي اللي دخل صيدلة القاهره بـ46 % خد بالك 46 مش 64!

اكتشفنا ان عندنا مليون الا ربع زويل .. مليون الا ربع يحي المشد .. وطبعا دا كله بفضل جهود السيد وزير التشعليم.

طبعا مقدرش انسي الاء .. عيله في اولي ثانوي قالت ان مصر بقت دلدول امريكا في المنطقه .. س وج وتحقيق .. لحد اما بابا حسني تدخل وطلع البت براءه وأكد علي حريه التعبير وأهميه تربيه النشء علي الديموقراطيه .. المهم انه في نفس الوقت كانت قضيه ابراهيم عيسي ووائل الابراشي مرفوعه اما المحاكم بأسم الرئيس!

وازمة كادر المعلمين اللي حولت اعتراض المعلمين علي الوزاره الي اعتراضهم علي النظام ككل .. استمرارا لموجة انقلاب جميع الفئات علي النظام من قضاه وصحفيين ومهندسين وعمال .. الخ.



فشلت فشل زريع في اختبار اول سنه يا معالي الوزير وللأسف اختبارك ملوش ملحق .. انت كده كده طالع السنه اللي بعدها .. يعني علي قلبنا الي ان يشاء القدر.

---

بمناسبة التعليم نزلوا علي الجامعه كلها بكل كلياتها منهج حقوق انسان
.. ماده ملهاش تلاته لزمه كده ومش هتضاف عالمجموع .. هنضحدك علي بعض احنا عندنا حقوق انسان أصلا!
---
تحديث : افتكرتله مصيبه كمان تصريح قاله ان اي تظلم هيتقدم هيتم تصحيح الورقه من اول وجديد .. وطبعا اما دخلنا في الجد رجع وقالك لا احنا هنعيد رصد الدرجات .. انا قلت كده عشان اهدي الناس.

حركه طفوليه في منتهي السذاجه ..لا تصلح ان تصدر من واحد المفروض يعني انه رئيس وزارة بيسموها وزارة الشعب .. جتها نيله!
ه


Friday, March 30, 2007

Rigging the referendum تزوير الاستفتاء

في المنصوره
In Mansoura



---
في ميت غمر- الدقهليه
In Meet Ghamr - Dakahlia



---
في بلقاس
In Belkas



---
في مكان غير معروف
In an unknown place



---
اجبار طالبات علي التصويت بنعم
Forcing students to vote with "yes"





وعلي رأي وزير العدل .. لقد قال الشعب كلمته


Wednesday, March 28, 2007

الف مبروك

الف مبروك علي الشعب المصري الموافقه علي التعديل

مبروك دسترة حالة الطوارئ

مبروك تأكيد الدوله البوليسيه

مبروك تأكيد عدم وجود نائب رئيس لضمان التوريث

مبروك حق الريس في حل مجلس الشعب من غير ماياخد رأينا

مبروك الغاء الاشراف القضائي

- علي تقديرات الحكومه شارك في الاستفتاء 27% .. وعلي تقديرات منظمات المجتمع المدني شارك 5% خلينا ورا الحكومه .. بالذمه مش مكسوفين؟؟ .. 27 %؟؟ دي حاجه تعر .. وزير الاعلام طالع يتفشخر بالارقام في التلفزيون .. ليك عين تطلع تقولها؟؟

-أكتر حاجه حرقت دمي ان الخبر بتاعنا دايما يجي وراه خبر موريتانيا

مفيش ولا مراقب شكك في نزاهة الانتخابات

والرئيس الجديد بالرغم من فوزه دعي منافسه الي تشكيل حكومة وحده وطنيه


ياااه امتي يجي اليوم اللي نبقي فيه زي الدول الديموقراطيه دي .. امريكا
واوروبا وموريتانيا



- بمناسبة تعديل 11 ماده خاصه بالاشتراكيه والقضاء علي مبادئ ثورة52 بالضربه القاضيه .. احب اهدي الحاكم بأمره اغنية عبد الحليم

يا عدو الاشتراكيه .. يا عديم المسئوليه .. هنزمرلك كدهو توووووت توووت

خد بالك يا حليم لايعتقلوك

ملحوظه انا مش اشتراكي ولا شيوعي ولا يساري ولا اي حاجه بتودي علي روسيا

Sunday, March 25, 2007

داستور ياهل الدار


من بين المواد اللي هيتم الاستفتاء عليها بكره وقفت شوية قدام المادة 136 بتقول .. لا يجوز للرئيس ان يحل مجلس الشعب الا عند الضروره وبعد استفتاء الشعب واذا وافق الاغلبيه يصدر قرار بحل المجلس .. اما النص المقترح هو انه يصبح عند الضروره واذا حل المجلس في امر فلا يجوز ان يحل المجلس الجديد لذات الامر.. شالوا استفتاء الشعب .. للدراجادي وصل الضحك عالدقون .. عايزني اوافق علي عدم اخذ رأيي؟؟ .. ان كل حاجه تبقي في ايد الريس؟ والشرط الوحيد ان سبب الحل ميتكرش مره تانيه؟؟ (طبعا هيلاقوا ميت سبب وميت ضروره)

---

في حوار مع الاهرام قال السيد مفيد شهاب " لم تعدل المادة 77 الخاصة بمدة الرئاسة لأنه مصادرة لإراده المواطن مسبقه "

اكيد انت بتهزر اكيد الصحفي مفهمكش كويس .. اما نحددها بمدتين يبقي دي مصادره لإراده المواطن؟ .. يا عيني علي ارادة المواطن الامريكي المصادره .. دول قعدوا يتحايلوا علي نيلسون مانديلا انه يكمل بعد المدتين وهو مرضاش .. طب نخليها مدتين وبعدين ونتحايل عليه و يبقي يقعد تلاته واربعه وعشره!

كلامك خساره فيه التعليق .. كلامك يتضحك عليه!

---

مادة 88

التعديل : سيتم اختيار لجنه عليا للاشراف علي الانتخابات .. وصحيح هي مكونه من اعضاء هيئات قضائيه سابقين وحالين .. بس مين اللي هيشكلها
يا تري؟؟ .. مين غير الحزب الحاكم .. فعلا حاميها حراميها .. وسلملي عالاشراف القضائي!

---

مادة 82

قبل التعديل : اذا قام مانع يحول دون مباشرة الرئيس لاختصاصاته اناب عنه نائب رئيس الرئيس وطبعا عشان نائب الرئيس ميمسكش الحكم زي مالريس عمل ولكي لايخرج الحكم من العائلة الكريمة .. تم اضافة او رئيس مجلس الوزراء عند عدم وجود نائب رئيس او تعذر نيابته.

وطبعا هتتعذر لأنه اصلا مش موجود .. ياللا مشيها رئيس الوزرا واهو يبقي زيتنا في دقيقنا.

بقيت الماده

"ولا يجوز لمن ينوب عن رئيس الجمهورية طلب تعديل الدستور او حل مجلس الشعب او مجلس الشوري او اقاله الوزاره"

دا رئيس ايه دا لمؤاخذه يعني مش واخد بالي!

---

مادة 179

مكافحة الارهاب .. دسترة حالة الطوارئ "المؤقته" بس علي انقح.

بعد اصدار القوانين الخاصه بهذه الماده .. هيكون من حق اي امين شرطه ميساويش تلاته مليم انه يدخل بيتك ويضربك ويتهجم عليك ويعتدي علي اهل بيتك ويجرجرك عالسجن من غير اذن نيابه ومن غير تهمه ومش هتعرف تقوله تلت التلاته كام.

- إضافه :

تعطي هذه الماده الحق لرئيس الجمهوريه ان يحول اي جريمه من جرائم الارهاب الي اي محكمه موجوده .. يعني اي واحد مش عاجبه يبقي بالسلامه ..

ملحوظه .. تعريف كلمة الارهاب في القانون المصري الصادر عام 1992

"
كل استخدام للقوة والعنف أو التهديد أو الترويع يستهدف الإخلال بالنظام العام أو تعريض سلامة المجتمع وأمنه للخطر ـ إذا كان من شأن ذلك إيذاء الأشخاص أو ترويعهم أو تعريض حياتهم أو حرياتهم أو أمنهم للخطر، أو الحاق الضرر بالبيئة أو بالاتصالات أو المواصلات أو بالأموال أو بالمباني أو بالأملاك العامة.. أو منع عرقلة ممارسة السلطات العامة، أو دور العبادة أو معاهد العلم لأعمالها، أو تعطيل تطبيق الدستور أو القوانين أو اللوائح."

شوف انت بقي يا حلو بتعمل كام حاجه من دي!

- تعطل هذه المادة .. المواد 41 و44 و 45 الخاصه بحقوق الانسان.

---

انهارده في الجامعه وزع طلاب الاخوان ورقه المفروض انها مجله اسمها بوليتيكا كاتبين رؤيه نقديه للتعديلات الدستوريه :

مادة 5

بعد التعديل : "لا تجوز مباشرة اي نشاط سياسي او قيام احزاب سياسيه علي مرجعيه دينيه او اساس ديني .."

المهم تعليقهم

".. ونحن اذ كنا متفقين مع حظر الاحزاب علي اساس ديني فان الحظر السياسي يضعنا في اشكالية مقصد الحكومه من هذا التعديل والادهي انه يتعارض مع الماده التانيه من الدستور .. "

الله يعني الماده التانيه شغاله اهو؟؟ امال ايه نصلح الدنيا بالدين؟؟ مهي الدنيا متصلحه والماده التانيه حلوه اهيه

وبعدين ازاي متفقين مع حظر قيام احزاب علي اساس ديني وازاي بتقولوا بتتناقض مع الماده التانيه؟

نكمل :

" .. ليس هذا فحسب بل ان قانون الاحزاب يحظر قيام الاحزاب المخالفه لأسس الشريعه الاسلامية .."

يعني ايه بردو ؟؟ الشريعه مطبقه ولا مش مطبقه؟
في احزاب علي اساس ديني ولا مفيش؟
الماده التانيه شغاله ولا مش شغاله؟

الاخوان .. تناقضات تناقضات تناقضات

دا غير السلبية طبعا لأنهم مقاطين الاستفتاء

---

انهارده الساعة 6 هيكون في اعتصام في ميدان التحرير هيشارك فيه كل القوي السياسيه لرفض التعديلات الدستوريه وهيستمر لغاية تاني يوم( الاتنين يوم الاستفتاء) الساعه 10 الصبح.

مش عارف اذا كنت هقدر اجي ولا لأ .. اما اشوف هقدر ازوغ من البيت ولا ايه النظام؟

---

اضافه:

صور وفيديو للاعتصام






Sunday, March 11, 2007

عندما نفقد الامل


عندما نفقد الامل
ويصبح النور اشبه بالظلمه
وتصبح الظلمه اقصي الاماني
ويصبح اليأس سيد الموقف
تكون النهايه
لا اعلم اي نهايه
هل هي نهايتنا نحن؟
ام هي نهاية الظلم لاننا سننتفض ضده؟
لا اعلم ولكننا اقتربنا من النهايه .. أو هي التي اقتربت منا

Friday, March 9, 2007

المجلس الموقر

خبر قديم شويه
" منع المصورين الصحفيين من تصوير جلسات مجلس الشعب"


يا تري ايه السبب ؟؟؟؟
لب وسوداني


ايووووووه التسالي





نااااام يا حبيبي نام


بعد كده هاتوا سرير بدل مالراجل عمال بيتقلب كده


من هذا الملاك النائم؟


نشجب ندين


نوم العواف
---
وسلملي عالمجلس الموقر!س

الصور من حكاوي

براءة 26 متهما في قضية صفر المونديال وإدانة 3 موظفين

نععععععم؟؟؟!!!

انا قريت الخبر دا في الجورنال وتنحت ..يا سلااااااااام ازاي يعني؟ .. حررررررام بجد .. محدش هيتعاقب؟؟ محدش هيتسجن؟؟ .. هي وصلت لكده .. لأ وشوفوا التلاته اللي ادينوا اتعاقبوا بإيه .. الباشا رئيس جهاز الرياضه الاسبق غرامه 3 اضعاف مرتبه .. والتانيه مذيعه خصم 15 يوم من مرتبها .. والتالت موظف بالشباب والرياضه خصم 15 يوم من مرتبه .. ياختشي كمليه .. هو دا العقاب! .. خلاص كده بح؟ .. فين الرفد والسجن علي اللي عملوه فينا .. حاجه تفرس!
س

لازم نطاطي نطاطي نطاطي


مجرد تذكير بما حدث تاني يوم بعد مقتل جندي مصري علي الحدود المصريه الاسرائيليه
احضان وبوس وضحكات ملأت الصحف ووسائل الاعلام
هو خلاص اتكتب علينا نطاطي للبشر كلها
نط في دماغي الموضوع دا بعد خبر اذاعة برنامج تسجيلي في التليفزيون الاسرائيلي عن قتل اسرائيل الوحشي لـ250 اسير مصري في حرب 67 .. ياتري دول كمان مصيرهم زي الجندي المصري ولا ايه؟
ولا يمكن عشان 250 فالاحضان والضحك هيزيدوا اكتر ؟
وتبقي كلمات الشيخ سيد درويش
عشان مانعلي ونعلي ونعلي .. لازم نطاطي نطاطي نطاطي

Monday, March 5, 2007

Emad Kabeer best actor of the year





مبروك لعماد الكبير الفوز بجائزة افضل ممثل لهذا العام بعد ان قال محامو الدفاع عن الظابط اسلام نبيه ان الفيديو مفبرك

---

اضغظ هنا لتشاهد الفيديو الاصلي للفنان عماد الكبير


تحذير ماده فيلميه تحتوي علي الفاظ ومناظر غير لائقه

--
وشهد عماد يصف كيف قام بالدور ببراعه

1
2
3

تحذير ماده فيلميه تحتوي علي الفاظ غير لائقه

كفايه اهمال بقي




36 كود

من ساعة ماشفت اعلان الفيلم وعرفت مصطفي شعبان طالع في دور ظابط وانا متردد لحد كبير اني ادخل الفيلم دا .. مش مستعد ادخل الاقي الفيلم عباره عن بطوله من بطولات جهاز الشرطه الساهر علي امن البلاد من الحراميه والوحشين .. مش متخيل ان لسه في حد ممكن يصدق الكلام دا .. يصدق ان نفس الناس اللي بيشفهم بيسحلوا البشر علي عربيات الامن المركزي و يعملوا عليهم حفله في الاقسام .. هما هما اللي سهرانين علي حمايتنا .. لامؤاخذه يعني!

بيتهيألي لو دخلت الفيلم هيبقي عشان مصطفي شعبان .. اكيد مش عشان حلاوة وجمال وزارة الداخليه


ملحوظه واحد صاحبي قالي انا هخشوا عشان اشوف النفاق واصل لحد فين .. قلتله وجهة نظر بردو! .. عموما بلاش نحكم عالفيلم قبل مانشوفه

Friday, March 2, 2007

Mission accomplished

تم القضاء على الوحش
Mission accomplished